قضية المهندس/ رضا عبد الكريم
نيابة ميناء الإسكندرية
محتوى الفيديو
بسم الله
نتيجة البلاغ المقدم للنائب العام كانت ناجحة على المستوى الأمني والحمد لله، وعدمية على المستوى القانوني.
نجحنا أمنياً لأننا قدرنا نصطاد طرف من أطراف العصابة بتاعة ميناء إسكندرية اللي بيديرها أحمد عبد العليم بيومي وبيرأسها بالطبع السيد المكاوي صاحب معارض السيارات اللي مغرقة مصر بفلوس غسيل الأموال من تجارة الآثار كما يُشاع عنه.
وإتأكدنا من نمو هيمنته على ميناء إسكندرية واستمرار تستر المسئولين على عمليات تهريب السيارات والمعدات الثقيلة اللي بتنفذها العصابة بالتعاون مع الوكيل الملاحي – شركة وكالة الخليج الإماراتية.
دي العريضة رقم 1178311 المقدمة للنائب العام واللي إتكلمت عنها في الفيديو اللي فات.
وزي ما حضراتكم شايفين تم تحويل القضية أو تحويل العريضة لنيابة غرب الإسكندرية الكلية في نفس يوم تقدمنا بالبلاغ، وتاني يوم تم تحويلها لنيابة ميناء إسكندرية الجزئية.
وكان تصرف ذكي من المكتب الفني للنائب العام أنه حول البلاغ إلى نيابة غرب الإسكندرية بالرغم من إن ميناء إسكندرية تابعة لشرق الإسكندرية تابعة لنيابة شرق إسكندرية.
لأن نيابة شرق الإسكندرية هي اللي قامت بالتستر على عملية تهريب معداتنا اللي تمت في نهاية 2019 وهي اللي أعطت الغطاء القانوني لهروب بعض أطراف عصابة ميناء إسكندرية من العقاب لما أحالت القضية للمحكمة بتهمة التزوير وليس التهريب، وبالمناسبة هي مازالت متواطئة ومُصرة على رفض إصدار خطابات لقسم شرطة منشية القناطر ونقطة شرطة زهراء مدينة نصر علشان نستلم بهم العربيتين بتوعنا المحجوزين هناك.
وأنا كاتب بالنص على موقعي (أن تحقيقات نيابة باب شرق الإسكندرية هي وصمة عار في جبين النيابة العامة يجب على النائب العام بنفسه محوها).
وعلى فكرة ده السبب الرئيسي لإنشاء الموقع علشان النائب العام بنفسه وكبار المسئولين في الدولة يقدروا يطلعوا على التفاصيل والمستندات الرسمية اللي بتثبت الجرائم على عصابة السيد المكاوي وشركاه.
وهتتأكدوا من كلامي حالاً مع شرح اللي حصل معايا في نيابة ميناء إسكندرية الجزئية يوم الثلاثاء 13 مايو 2025.
بدايةً أنا نشرت فيديو بلاغ النائب العام يوم 18 أبريل وأعلنت فيه عن رقم العريضة بعد تأكدي من استقرار البلاغ في نيابة ميناء إسكندرية يوم 17 أبريل علشان نخرج عصابة مينا الإسكندرية من جحورها، وتم بتوفيق الله.
جاني اتصال هاتفي من أحمد عبد العليم بيومي بيهددني فيه بطريقة ناعمة وقالي إني ما تنساش إن وراه عضمة تقيلة.
ثم يوم الأربعاء 30 أبريل الساعة كانت 02:19 ظهراً جاني اتصال من السيد / مجدي فؤاد – أمين شرطة والإستيفا بنيابة ميناء إسكندرية بيطلب حضوري يوم الأحد 4 مايو لمقر النيابة للإدلاء بأقوالي بخصوص البلاغ المقدم للنائب العام.
وكنت عارف أنا والفريق القانوني إن هدف الاتصال هو إتمام الإجراءات لحفظ البلاغ، فقررنا المماطلة لغاية ما نتخذ الإجراءات اللازمة.
وكرر السيد / مجدي فؤاد اتصالاته علشان أروح النيابة، لغاية ما اتصلت به يوم الأحد 11 مايو وقولتله إن الشئون القانونية هتتصل به وهتحضر للإدلاء بأقوالها نيابة عني.
فاتصل بي تاني يوم، يوم الأثنين 12 مايو الساعة 02:10 ظهراً السيد / محمد خاطر وكيل النائب العام بيطلب حضوري بنفسي في اليوم التالي وقال إن الأمر بسيط.
بالفعل روحت نيابة ميناء إسكندرية الجزئية يوم الثلاثاء 13 مايو 2025
روحت فقط لإقامة الحجة عليهم بعرض كل المستندات الرسمية اللي بتثبت صحة بلاغي بالرغم من أنها موجودة على الموقع.
ولكن وكيل النيابة ما سمحليش بتقديم أي مستندات وقالي القضية خلاص اتحكم فيها وما ينفعش تتفتح تاني.
قولتله ما أنا أكيد عارف، لكن الحكم في التزوير مش في عملية تهريب السيارات اللي أنا بالفعل مسكت اتنين منهم.
لم يهتم.
قولتله أنها عصابة كبيرة ومشارك معاهم وكيل ملاحي غير مصري وغالباً عمليات التهريب مستمرة طول الوقت.
لم يهتم.
طلبت منه خطابات لأقسام الشرطة علشان أستلم العربيتين المحجوزتين وتكليف لمباحث السيارات لضبط الـ 6 سيارات المفقودين وأمر بالقبض على أحمد عبد العليم بيومي بتهمة تزوير رخص السيارات.
قالي أنه ما يقدرش يعمل أي حاجة وأن القضية تابعة لنيابة شرق إسكندرية.
بس كده.
لم تهتم نيابة ميناء إسكندرية بوجود عصابة تهريب الشحنات الكبيرة من ميناء الإسكندرية وبتهدد الأمن القومي المصري.
أعتقد بكده أكون أكدت ضرورة متابعة القضية من مكتب النائب العام مباشرة، وأثبتت لرئاسة الجمهورية ورئاسة الوزراء خطورة العصابة على الأمن القومي المصري والاستثمار الأجنبي، فأنا مستثمر أجنبي.
كما أعتقد أن جريمة الفساد الضخمة اللي بحاربها أصبحت أكثر وضوحاً أمام الرقابة الإدارية وأجهزة الأمن المصرية.
شكراً جزيلاً لدعمكم ودعائكم.
شكراً لوقتكم.
وتحياتي لحضراتكم.
بلاغ للنائب العام بتاريخ 16 أبريل 2025
محتوى الفيديو
بسم الله
تقدمت ببلاغ للنائب العام بالأمس الأربعاء 16 أبريل 2025
بلاغ مختصر في ورقة واحدة أخد رقم عريضة 1178311
بقول فيه إن كل الجرائم اللي تعرضت لها كانت لخدمة مصالح رجلين الأعمال:
السيد المكاوي وأحمد عبد العليم بالإضافة لوكيل لجنة الإسكان بمجلس النواب المهندس طارق شكري صاحب كومباوند صن كابيتال.
وموضح فيه موقعي رضا كريم دوت كوم وبقول إنه موقع توثيقي موجود عليه كل المستندات الرسمية اللي بتأكد صحة بلاغي،
حتى صور الرخص المزورة باسم أحمد عبد العليم الخاصة بعربيات … بامبات الخرسانة بتاعتنا اللي هربها من ميناء الإسكندرية بالتعاون مع الوكيل الملاحي – شركة وكالة الخليج الإماراتية معروضة على الموقع،
وأنا عامل مينشن لوزارة الداخلية هنا مع الفيديو وياريت يشوفوا الرخص المزورة وينفذوا القانون على أحمد عبد العليم.
ومع كل فيديو بنشره بعمل مينشن لرئاسة الجمهورية ورئاسة الوزراء والنيابة العامة وكل الوزارات المعنية، لأني بطالب بحقي القانوني ومش عايز غير الشفافية.
شكراً لوقتكم.
وتحياتي لحضراتكم.
الموقع الرسمي لقضية المهندس / رضا عبد الكريم
محتوى الفيديو
بسم الله
www.redakarim.com
هو موقع بيوثق المشكلة كاملة، كل الجرائم، بكل تفاصيلها.
المستندات الرسمية.
المحاضر الرسمية.
تحقيقات النيابات.
بلاغات النائب العام.
الشكاوى اللي قدمناها للوزارات، للتفتيش القضائي، لشئون الظباط في وزارة الداخلية، لهيئة الرقابة الإدارية.
كل حاجة.
بالأسماء والوظائف.
علشان نرفع الحرج عن كل مسئول وفي نفس الوقت نقطع الطريق على الموظفين الفاسدين اللي بيتصلوا بالسيد المكاوي أو غيره قبل ما تتاخد إجراءات جادة لمحاكمة المجرمين ومحاسبة الموظفين الفاسدين.
كما أرجو من حضراتكم متابعة صفحتنا الجديدة على الفيسبوك، لأن صفحتنا القديمة للأسف إتسرقت من 6 شهور.
شكراً لوقتكم.
وتحياتي لحضراتكم.
إستيلاء كومباوند صن كابيتال والسيد المكاوى على معدات بعشرات الملايين | رجاءاً ساعدونا فى نشر قضيتنا
محتوى الفيديو
أرجو من حضراتكم
من كل مصري ومصرية
ومن كل جريدة وحساب إخباري ومؤثرين على السوشيال ميديا
خايفين على بلدنا من إنها تكون لعبة في إيد كل من تُسول له نفسه البلطجة على القانون واغتصاب حقوق الإنسان،
إنه يساعدني في نشر الفيديو ده،
ونشر مشكلتي علشان النائب العام ورئيس الوزراء والوزارات المعنية ينتبهوا لها ويحققوا فيها،
ومشكلتي خلاص مشروحة بالوقائع والمستندات الرسمية على حساباتي كلها.
لأن لما أمن كومباوند صن كابيتال يمنع أكتر من عشرين مهندس وفني من شركتنا من الدخول لموقع العمل ويقولهم إن مقركم الإداري ومعدات البناء الضخمة الخاصة بكم بقت خلاص ملك لشركة السيد المكاوي،
يبقا في حاجة خطر، خطر كبير جداً بتحصل وضروري النائب العام يحقق فيها بنفسه.
حتى لو صن كابيتال كان مشروع من مشروعات شركة صن سيتي التابعة لشركة عربية أوفيس بيلدنج،
اللي رئيس مجلس إدارتها المهندس طارق شكري وكيل لجنة الإسكان بمجلس النواب.
أعتقد يا سيادة النائب العام إن مشروعات المهندس طارق شكري مش فوق القانون.
ودي معاينة الشرطة لمعداتنا داخل صن كابيتال، واسم ولوجو شركتنا واضح زي الشمس على المعدات الضخمة.
ودى صور لبعض مستخلصاتنا المالية المستحقة على شركة صن سيتي.
وده قرار النيابة بإحالة السيد المكاوي وأحمد طارق شكري وآخرين للمحاكمة بتهمة السرقة.
ليه قرار الإحالة ما بيتنفذش؟
وليه حقوقنا ضايعة لغاية دلوقتي؟
دي أسئلة من حقي وحق الجميع إننا نعرف إجابتها من أجهزة الدولة المعنية وعلى رأسها النيابة العامة،
وأنا عامل مينشن تحت الفيديو لكل أجهزة الدولة المعنية بالمشكلة.
من فضل حضراتكم ساعدوني في نشر الفيديو والمشكلة كلها.
ربنا يبارك في حضراتكم.
إستغاثة مستثمر أجنبى | تهريب سيارات ضخمة لصب الخرسانة من ميناء إسكندرية ومكافأة لمن يعثر عليها
بلاغات هامة وعاجلة للنائب العام | قضية المهندس رضا عبد الكريم
محتوى الفيديو
أنا حابب أقول لحضراتكم إني قدمت بلاغات للنائب العام في منتصف شهر 11 اللي فات نوفمبر 2023 وهعرضهم على حضراتكم فى الفيديو (00:40:00)، لأن كتير من المتابعين الأفاضل بينصحوني بإبلاغ النائب العام عن تهريب معداتنا من ميناء إسكندرية وعن استيلاء إدارة صن كابيتال على معداتنا ومستخلصاتنا المالية وعن محاولات الاختطاف إللى إتعرضت لها، والكل بيقولي إن الحل الوحيد لمشكلتنا هو تدخل النائب العام.
طيب أنا قدمت للنائب العام الشكوتين المعروضين على الشاشة (00:40:00) ورقم عريضة كل شكوى موجود عليها.
وكانت بتيجي لى رسايل على الموبايل من مكتب النائب العام بتفيد إن الشكاوى قيد الفحص بالمكتب الفني، ثم رسايل بتقول أنها قيد الفحص بالنيابات إللى أنا أصلاً مشتكيها، ثم توقفت الرسايل ومش عارف هو إيه إللى حصل فيها؟
أعمل إيه ؟
أنا فعلاً مش عارف !
أتمنى لو حضراتكم تقولولي أعمل إيه؟
علشان النائب العام يحقق فى شكوانا إللى قدمناها من 4 شهور.
ياسيادة المستشار محمد شوقي النائب العام من فضلك كلف مسئول من مكتب حضرتك بأنه فقط يعرفنا نتابع إزاي مع حضرتك.
هو مش فى توجه رسمي لحل مشكلات الاستثمار الأجنبي؟
طيب أنا مصري ومكمل حياتي في مصر إن شاء الله
لكن في الشغل مستثمر فرنسي يعنى مستثمر أجنبي.
هو فى إيه ؟
لا حول ولا قوة إلا بالله
لا حول ولا قوة إلا بالله.
مهندس/ رضا عبد الكريم مستثمر فرنسى (مستثمر أجنبى) من أصل مصرى يستغيث بالشعب المصرى وأجهزة الدولة
مبادرة للمساهمة فى توفير السلع الأساسية بأسعار عادلة أو مجاناً لغير القادرين | قضية رضا عبد الكريم
محتوى الفيديو
أنا بعتذر (إنى هتكلم) النهارده عن التطورات المهمة والخطيرة إللى تمت فى قضيتنا فى ظل المشاكل الحياتية الغير معقولة إللى الجميع بيتعرض لها مع إرتفاع الأسعار الأساسية بطريقة مجنونة وغير منطقية.
لكنى بعتقد إن جزء ضخم من مشاكل الناس دلوقتى سببه فساد الضمير، وممكن يكون هو السبب الرئيسي فى الظلم الواقع علينا.
وزى ما بيقولوا الغاوي بينقط بطاقيته.
فأنا هعرض على حضاراتكم النهارده فكرة أو مبادرة للمساهمة فى توفير السلع الأساسية بأسعار عادلة للقادرين وبنصف السعر للأقل قدرة ومجاناً لغير القادرين من الطبقة الوسطى المتوسطة والفقيرة.
وهى مبادرة نعتقد إنها ممكن تساهم فى حل المشكلة وبالطبع مش حل كامل للمشكلة.
وتطورات القضية فيها جزء إيجابى وجزء سلبى، وجزء بيتعلق بالمهندس محمد الحسيني المدير التنفيذي لشركتنا وحرمه السيدة سمر حمدي رئيسة مجلس إدارة الشركة،
وجزء بيتعلق بمقابلة بيني وبين أحمد عبد العليم لمحاولة تحقيق حل ودي أو عرفي للمشاكل بينا.
وهو الشخص إللى إتهمناه بتزوير المستندات إللى إتهربت بها 8 سيارات ضخ خرسانة بميناء الإسكندرية.
وكانت مقابلة مؤسفة للغاية، تطاول واستعراض للقوة والنفوذ ومكايدة بأنه باع 6 عربيات من الـ 8 عربيات، وبأن العربيتين إللى الشرطة متحفظة عليهم يقدر يستلمهم فى غمضة عين بمجرد اتصال هاتفي من المسئولين إللى بيسندوه إللى بيحموه.
وتفاخر بنفوذه إللى قدر بها يحصل على أراضي فى الساحل الشمالي بسعر رمزي ودلوقتي الحكومة مقدراها بمئات الملايين.
وتهديد بأنى مش هقدر أوصل معاه لأى حاجة لأن أى تحقيقات فى النيابة هو مسيطر عليها وأى قضية الحكم فيها بيكون باتفاق معاه، وإن حبايبه فى الشرطة معطلين محاولاتي لاستلام العربيتين المحجوزين.
وفى النهاية قالى إعمل (أعلى) ما فى خيلك إركبه، وقال للأخ الكريم إللى دبر المقابلة بينى وبينه إنه عارض لى نص مليون جنيه مقابل تنازل عن كل إتهاماتى ضده.
8 عربيات قيمتهم 2 مليون دولار غير التعويض عن 4 سنين مش شغالين فيهم تحولوا لنص مليون جنيه!!
أى نفوذ مجنون يسمح له بالكلام بكل الثقة دى؟؟؟
ولما الأخ إللى مدبر المقابلة حاول يحذره من نتيجة بعض التحقيقات الجادة إللى بتم حالياً فى مشكلتنا، رد عليه بمنتهى الاستخفاف بأن مافيش أى إجراء هيتاخد ضده قبل عرضه عليه أولاً.
وأعتقد هو ده السبب إللى بسببه حذرني القائمين بالتحقيقات من الإفصاح عن الجهات إللى بتحقق حالياً فى مشكلتنا، وهى جهات وطنية شريفة ومتولي التحقيقات فيها أشخاص أراهم غاية الوطنية والنزاهة، وإن كنت ألتمس منهم أخذ خطوات أكثر سرعة فى التحقيقات.
وأرجو من وزير العدل السيد المستشار/ عمر مروان البت فى الشكوى المقدمة فى القاضي إللى حكم بالبراءة لأحمد عبد العليم وأخرين بالرغم من وضوح عملية تزوير المستندات.
كما أرجو من السيد المستشار/ محمد شوقي النائب العام البت فى الشكوى المقدمة إليه بخصوص سير تحقيقات النيابة فى بلاغاتنا ضد أحمد عبد العليم والسيد المكاوي وطارق شكري والوكيل الملاحي شركة وكالة الخليج وآخرين.
وبالنسبة للمبادرة أو الفكرة الخاصة بالمساهمة فى توفير السلع الأساسية وخاصةً السلع الغذائية بأسعار عادلة للقادرين وبنص السعر للأقل قدرة ومجاناً لغير القادرين من الطبقة المتوسطة والفقيرة.
فهى إتعرضت عليا من صديق عزيز للمساهمة فيها وإطلاقها من خلال حساباتي على السوشيال ميديا، وإن إنكتب لها النجاح إن شاء الله هنخصص لها حسابات على منصات السوشيال ميديا المختلفة.
وتانى بأكد على حضراتكم إن المبادرة ممكن تساهم فى حل المشكلة وليس حل كامل للمشكلة.
والفكرة هى تأسيس شركة مساهمة أو أكتر والتعاون مع جمعية خيرية قائمة لإنتاج وتوزيع ووهبة المنتجات والسلع الغذائية وتأسيس شركة للتسويق الداخلي والدولي.
تمويل الشركة أو الشركات هيكون من مساهمين مصريين فى الداخل ومصريين من الخارج ومستثمرين أجانب.
والنشاطات هتكون:
- 1. توزيع المواد الغذائية المنتجة محلياً والمستوردة.
- 2. الاستحواذ على مزارع خضروات وفاكهة ودواجن وماشية وأسماك.
- 3. الاستحواذ على أو المساهمة فى مصانع منتجات غذائية متعثرة.
المساهمات من خارج مصر سواء من مصريين أو أجانب هتكون فى صورة مدخلات إنتاج أو أموال، والمساهمة من داخل مصر هتكون بصورة أساسية أموال وبالطبع ممكن تكون مدخلات إنتاج.
وحصص المساهمين من مخرجات الإنتاج هتكون فى هيئة منتجات تلتزم شركة التسويق ببيعها مع التزام المساهم بتحقيق نسبة ربح تحقق الاستمرار للشركات وهى نسبة ربح ضئيلة، مع إتاحة الميزانيات التفصيلية للجمهور.
وبكده المستثمر المحلي هيقدر يتحكم فى حصته من المنتجات سواء بتحقيق ربح عادل أو بالتبرع بقيمتها جزئياً أو كلياً، والمستثمر الخارجي إن كان مصري بالخارج هيحافظ على رأسماله بالعملة الأجنبية وهيقدر يوفر لأهله ومعارفه داخل مصر منتجات عالية الجودة بسعر عادل أو بتبرع جزئي أو كلي، وإن كان مستثمر أجنبي فلن يتأثر بالتقلبات الاقتصادية الداخلية.
ومن أهم مميزات المبادرة:
– عدم تحميل الاقتصاد المصري دولار واحد يتم تحويله للخارج كما يحدث عادة فى الاستثمار الأجنبي فى أى مكان فى العالم، بل بالعكس هنضمن استمرار تدفق الدولارات من الخارج سواء من المستثمرين الأجانب أو من المصريين بالخارج.
– المساهمة الملموسة فى توازن السوق وتخفيض الأسعار.
– والمساهمة فى الحفاظ على قيمة المدخرات من الانخفاض والتآكل.
لأنه لو عملنا قيمة السهم 100 جنيه مثلاً، هيقدر أى مصري يشتري ولو سهم واحد لو حب وهيحصل أمامه على سلع بسعر المصنع أو المستورد، بالطبع هتكون أقل من سعر السوق ولو كانت من إنتاج شركاتنا أو مزارعنا أو من استيرادنا هتكون أقل بكتير من سعر السوق.
وإن شاء الله مع الوقت هيكون للمبادرة دور فى عملية تخفيض الأسعار وانضباط جزئي للسوق.
بالطبع المبادرة مليانة بالتفاصيل الخاصة بإمكانية تنفيذها، ولكن دى حاجة يمكن مناقشتها معايا أو مع صديقي صاحب فكرة المبادرة.
وطبعاً لا يكلف الله نفساً إلا وسعها، فأنا تعهدت لصديقي بتخصيص 25% من قيمة السيارات للمبادرة وهى هتكون ما يمثل نصف مليون دولار فى حالة استردادي للـ 8 سيارات أو فى حدود ما يعادل 125 ألف دولار فى حالة قيام الشرطة بتسليمي العربيتين المتحفظين عليهم، غير طبعاً محاولاتي لاجتذاب مستثمرين أجانب لمشروعات المبادرة.
وربنا يقدم إللى فيه الخير لنا كلنا، وربنا كبير.
شركة شحن عالمية تشارك فى عمليات تهريب كبرى من ميناء إسكندرية بمباركة المركز الرئيسى فى الإمارات
محتوى الفيديو
أنا مضطر آسفاً النهارده إني أقول معلومات قد تكون مزعجة للبعض بخصوص الوكيل الملاحي “شركة وكالة الخليج”، ولكنى مضطر أقولها لأنى بعد شهر ونص من المراسلات مع المقر الرئيسي فى دبي فى الإمارات، وبعد استشارة المسئولين فى السفارة الفرنسية وأكتر من شخصية فى مواقع مسئولة فى حكومتنا فى مصر.
مبدئياً “شركة وكالة الخليج” كوكيل ملاحي بيكون مخصص لها مساحة فى أرض مينا إسكندرية بتخزن فيها البضائع المشحونة عن طريقها سواء البضايع دى بتدخل مصر من خلال الجمارك أو هتكون ترانزيت وبيتعاد تصديرها لدول أخرى، والبضائع دى ممكن تكون أى حاجة بمعنى إنها ممكن تكون أى حاجة مش هوضح أكتر من كده.
ولحساسية نشاط أي وكيل ملاحي وغير إنه بيكون تحت إشراف قطاع النقل البحري فى وزارة النقل بيكون نشاط متراقب من حرس حدود ومن جهة مخابراتية مش عارف بالظبط أي جهاز أمن وطني ولا المخابرات العامة ولا المخابرات الحربية، وأرجو لو حضراتكم تفيدوني بالجهة المضبوطة المخصصة لهذه المراقبة
لأني خلال فترة قصيرة إن ما حصلتش على توضيح وافى وتعويض كافي من شركة وكالة الخليج هقدم بلاغات لأعلى الجهات الأمنية فى مصر علشان نفهم إن كانت تجاوزات الوكيل الملاحي “شركة وكالة الخليج” حصلت معانا فقط ولا بتحصل مع غيرنا بالتعاون طبعاً مع عصابة مينا إسكندرية إللى إتكلمت عنها فى الفيديو فى شهر أغسطس إللى فات
وللتذكير التجاوزات إللى كانت بخصوص تسليم 5 شحنات خلال مدة شهرين عبارة عن عربيات ضخمة تحمل مضخات خرسانية ضخمة لأشخاص لا علاقة لهم بشركتنا بتفويضات عليها أختام مزورة لبنك الـ CIB
ولحساسية وخطورة نشاط الاستيراد عموماً بيكون فى ملف بيتفتح فى جمارك إسكندرية قبل الإستيراد إسمه نموذج 6 بيكون فيه كل أوراق الشركة من سجل تجارى لشهادات ضريبية لتوكيلات لتفويضات المعمول بها للمستخلص الجمركي، ونموذج 6 ده بيكون على السيستم ومتاح للوكيل الملاحي وكل وزارات وجهات حكومية بتتعامل مع الشحنات المستوردة.
وأعتقد إن قلقي من نشاط “شركة وكالة الخليج” مُبرر، لأن العربيات حجمها كبير وتمنها 2 مليون دولار!
وأعتقد كده كلنا كمواطنين وكدولة مصر بأجهزتها الأمنية لنا كامل الحق على “شركة وكالة الخليج” إنها تقدم تفسير واضح لمشاركتها فى عملية التهريب إللى تمت.
فى الباقى من الفيديو هعرض الإيميلات إللى تمت بينى وبين المقر الرئيسي فى دبى فى الإمارات لـ “شركة وكالة الخليج” وفيها معلومات قد تهم البعض.
أنا حاولت التواصل هاتفياً مع المقر الرئيسي للشركة فى دبي بعد فيديو عصابة مينا إسكندرية إللى نشرناه فى أغسطس الماضي
وبعد عدة محاولات تحدثت هاتفياً مع السيدة “لورديس إيليجان” المساعدة الشخصية للمدير الإداري للشركة وشرحت لها المشكلة وطلبت منها التواصل مع المسئول المختص،
وبالفعل مشكورة أرسلت الإيميل ده للإدارة يوم 5 سبتمبر وأرسلتلى نسخة منه، بتقولهم فيه إنى عايز أتكلم مع المختص فى الشركة عن ادعائي بمشاركة “شركة وكالة الخليج” فرع مصر فى عملية تهريب لمعداتي.
وبعد ساعتين السيدة “إيمى برينان” Group Compliance Manager فى القسم القانوني لمجموعة جاك “شركة وكالة الخليج” أرسلت لى الإيميل ده بتقولى فيه ياريت أعطيها ملخص تفصيلي عن ظروف المشكلة وعن الكيانات والأشخاص المشاركين فيها علشان تبدأ فى تحقيق داخلي.
يوم 6 سبتمبر أرسلت لها الإيميل ده وقولتلها إنى هرسلها فيديو يشرح المشكلة إللى هو فيه عصابة مينا إسكندرية وإعتذرت لها إن الفيديو بالعربي وإنه غالباً هيكون موجود شخص قادر على ترجمته فى مكتبها،
وقولتلها أن الأمر جاد جداً وإنى سبق لى التعامل مع شركتكم فى أوروبا وفى بريطانيا وعارف قد إيه أنتوا محترمين ووجود موظفين فاسدين عندكم هيكون شئ مؤسف جداً، وأبلغتها استعدادي لتقديم أى معلومات تانية تحتاجها.
بعد إسبوع يوم 13 سبتمبر ردت عليا بالإيميل ده تقولى أنها بتقوم بتحقيق داخلي فى المشكلة وأنها هترد عليا بالنتائج فى الوقت المناسب.
وأنا رديت عليها فى نفس اليوم بالإيميل ده وشكرتها وأبلغتها استعدادي لتقديم أى معلومات تانية تحتاجها.
وفى نفس اليوم أرسلت لى الإيميل ده بتقولى فيه إنها مسافرة فى رحلة عمل.
بعد إسبوع يوم 19 سبتمبر أرسلت لها الإيميل قولتلها إنى منتظر نتيجة التحقيق وأبلغتها استعدادي لتقديم أى معلومات تانية تحتاجها.
فى نفس اليوم ردت عليا بالإيميل ده بتقولى فيه إنها فى أجازتها السنوية وهترجع للشغل يوم 25 سبتمبر
انتظرت ترجع من أجازتها وأرسلت لها الإيميل ده يوم 27 سبتمبر وقولت لها ياريت تاخد شكوتنا على محمل الجد وإنى منتظر نتايج التحقيق.
وإنتظرت لمدة إسبوعين نتيجة التحقيق الداخلى فى المركز الرئيسي لـ “شركة وكالة الخليج” وكنت خلالهم بتواصل هاتفياً مع السيدة “لورديس إيليجان” المساعدة الشخصية للمدير الإداري، وكانت بتقولى إن التحقيق مستمر وأنهم هيبلغونى بالنتيجة فور انتهاء التحقيق.
وبعد أكتر من شهر من بداية التواصل مع المركز الرئيسي فى دبي فى الإمارات كان الرد عليا بالإيميل المؤسف ده من السيدة “إيمى برينان” بتقولى فيه إنها أجرت التحقيق الداخلي مع الموظفين المسئولين فى “شركة وكالة الخليج” فرع مصر بمشاركة نائب رئيس مجموعة جاك فى أوروبا وأفريقيا السيد “توماس أوكوبو” وأنهم لم يجدوا أى أدلة تثبت إدعائاتى، وبناءاً عليه فالقضية تُعتبر أُغلقت.
وأنا بناءاً عليه أرى أن التحقيق أسفر عن مباركة المقر الرئيسي لـ “شركة وكالة الخليج” فى دبي فى الإمارات لعملية التهريب إللى حصلت على معداتنا من ساحة الخليج فى مينا إسكندرية فى مصر،
وممكن تكون المباركة دى دليل مهم على مشاركة الوكيل الملاحي “شركة وكالة الخليج” فى عمليات تهريب كبرى بتضر بأمن واقتصاد وسمعة مصر مع عصابات تهريب أخرى غير إللى إتكلمت عنها فى الفيديو فى شهر أغسطس إللى فات
وزى ما قولت لحضراتكم إنى هنتظر قليلاً قبل تقديم بلاغات رسمية ضدهم لحرس الحدود وجهاز المخابرات المختص بمتابعة نشاطهم.
وعلشان أكون أتممت واجبى وأخليت مسئوليتي فأنا أرسلت لها الإيميل ده، وفيه بشرح المشكلة بالتفصيل وأرفقت معه المستندات إللى عرضتها فى أول الفيديو بالإضافة لمجموعة أخرى من المستندات الرسمية إللى عرضناها فى فيديو عصابة مينا إسكندرية.
وهنعرض الفيديو مترجم للإنجليزية وهنبعته لمديرين فى “شركة وكالة الخليج” غير السيدة “إيمى برينان” وهنتابع مع حضراتكم التطورات إن شاء الله، والله المستعان.
إستغاثة مستثمر أجنبى | تجاوزات خطيرة من وزارات النقل والمالية وبنكى إسكندرية و CIB
محتوى الفيديو
بعد فيديو عصابة مينا إسكندرية اللي نشرناه في شهر أغسطس ووضحت فيه بالأدلة والمستندات الرسمية إزاي تم الاستيلاء على معداتنا
كتير من المتابعين الأفاضل علقوا على تجاوزات واضحة تمت من خلال وزارات النقل والمالية والعدل ومن النيابة العامة وبنك إسكندرية وبنك الـ CIB وطبعاً من المتواطئ الرئيسي الوكيل الملاحي “شركة وكالة الخليج”
مش عارف نقدر ننبه السيد الفريق كامل الوزير والسيد الدكتور محمد معيط إزاي للي حصل في وزارتهم وبسببه إتسرقت منا معدات بأكثر من 30 مليون جنيه بأسعار 2019
أو إزاي نقول لبنك إسكندرية وبنك الـ CIB إن التعليقات على الفيديو نصحتنا باختصام البنكين لأنهم لم يقاضوا أفراد العصابة اللي زورت أختامهم على عدد كبير من المستندات
وإن ده بيشير لوجود شريك للمهربين من داخل كل بنك بيعطل اتخاذ البنكين للإجراءات القانونية المتبعة عند تزوير أختامهم
يا سيادة الدكتور محمد معيط وزير المالية أحد المتابعين الكرام أشار لحتمية وجود مندوب من جمرك إسكندرية لفحص المستندات مع مُستلم الشحنة
وحضرتك دول 5 شحنات تم الإفراج عنهم خلال شهرين بتفويضات مش حتى توكيلات، يعنى مش حتى توكيلات رسمية وكمان التفويضات عليها أختام بنكية مزورة وعرضتها في الفيديو
يعنى بوضوح موجود موظف أو أكتر في جمرك إسكندرية مكانهم فى السجن، ووزارة المالية مسئولة على محاسبتهم وتقديمهم للقضاء ومسئولة عن تعويض خسارتنا
يا سيادة الدكتور محمد معيط وزير المالية إحنا محتاجين من الوزارة نسخ رسمية من بوالص الشحن لأننا مش عارفين نحصل عليها لغاية دلوقتي
والبوليصة سند الملكية، وبالبوالص أعتقد ممكن الشرطة تسلمنا العربيتين اللي عندها وتبحث عن الـ 6 عربيات المفقودين
يا سيادة الفريق كامل الوزير وزير النقل بالله عليك تدخل وساعدنا نسترد حقوقنا
أنا حاولت التواصل مع حضرتك بعد نشرنا لفيديو عصابة مينا إسكندرية لكن للأسف ما عرفتش
طيب أعمل إيه علشان حضرتك تتدخل وتتخذ الإجراءات اللازمة مع السيد المهندس/ محمد عناني عبد اللطيف رئيس الإدارة المركزية للنقل البرى اللي اعتمد 5 موافقات إفراجات جمركية لـ 5 شحنات لصالح شركة غير شركتنا
يا سيادة الفريق كامل الوزير وزير النقل قولي أعمل إيه علشان حضرتك تتخذ إجراءات حاسمة مع الوكيل الملاحي (شركة وكالة الخليج) والناقل البحري اللي هما تحت إشراف قطاع النقل البحري في وزارة النقل
وعرفت من تعليقات ورسايل المتابعين المحترمين إن الإتنين مسئولين عن تعويضنا بتمن المعدات المشحونة، يعنى حضرتك تدخلت أو لو تدخلت بحزم معاهم ممكن نسترد حقوقنا
يا سيادة الفريق دي مينا إسكندرية كلها تحت إشراف حضرتك
لا حول ولا قوة إلا بالله
يا حضرات المحترمين اللي بتشوفوا الفيديو
يا سيادة رئيس مجلس ادارة بنك إسكندرية
يا سيادة رئيس مجلس ادارة بنك CIB
يا سيادة الدكتور محمد معيط وزير المالية
يا سيادة الفريق كامل الوزير وزير النقل
تدخلوا من فضلكم
تدخلوا يرحمكم الله.
إستغاثة وطلب دعم عاجل من فضلكم
محتوى الفيديو
بعد استغاثتنا بالله إحنا بنستغيث بحضراتكم
شهر نوفمبر ممكن يكون لا قدر الله شهر المذبحة ليا ولشريكي المحبوس محمد الحسيني
ولمدام سمر حمدي زوجته الهربانة ببناتهم من تنفيذ الأحكام
يوم 7 نوفمبر و28 نوفمبر عندنا جلسات أحكام
وإحنا مرعوبين من استغلال خصومنا لإنشغالنا كلنا بأخواننا في غزة وفلسطين ربنا ينصرهم
ويحاولوا يستخدموا نفوذهم للمرة الألف علشان يستولوا على حقوقنا
ومش عارف هنقدر ننبه وزير العدل والنائب العام الجديد إزاى؟
للتعسف الرهيب اللي بيتم ضدنا في كل خطوة بتحصل فى التقاضي
يوم 7 نوفمبر إيصال أمانة بـ 860 ألف مرفوع ضدي من أشخاص لا أعرفهم ولا عمري شوفتهم
والحكم ياا لدفع يا الحجز على ممتلكاتي اللي هي خلاص ما بقتش موجودة
وإيصال الأمانة ده أصلاً مزور!
لأنه كان على بياض للسيد المكاوي أثناء توريده لشركتنا خامات بناء في مشروع صن كابيتال
ومش عارف المحكمة هتقبل طلبنا بالطعن بالتزوير على الإيصال ولا هيحصل إيه تانى؟
ويوم 28 نوفمبر عندنا جلسة نطق بالحكم فى قضية فى المحكمة الاقتصادية
كنت قولت لحضراتكم إننا منتظرين تقرير الخبرا فيها وبالفعل الخبرا قدموا التقرير للمحكمة
وإحنا وخصومنا قدمنا المستندات
وهى القضية الخاصة بإستيلاء شركة السيد المكاوي وإدارة صن كابيتال
على معداتنا ومقراتنا الإدارية ومستخلصاتنا المالية من مشروع صن كابيتال
المملوك للنائب طارق شكري وكيل لجنة الإسكان بمجلس الشعب (النواب) وربنا يستر
تخيلوا حضراتكم إن قضية إيصال الأمانة المزور اللي إتحبست بسببها 4 شهور
ومحكمة النقض لغت الحكم أواخر 2022
لغاية دلوقتي مش عارفين نحصل على أوراق القضية
مع إننا معانا رقم الصادر من محكمة النقض لنيابة أكتوبر الكلية
كل ما نسأل عن وصول القضية فى النيابة يترد علينا إن القضية ما وصلتش؟!
ونرجو لو حضراتكم تقدروا تساعدونا فى الحصول على أوراق القضية
وتاني بناشد وزير العدل السيد المستشار/ عمر مروان
بخصوص الحكم ببراءة المتهمين فى قضية الاستيلاء على معداتنا من داخل حرم ميناء الإسكندرية
وبخصوص إجراءات تعسفية كتير أتخذت ضدنا خلال معركتنا القضائية مع خصومنا
وبناشد النائب العام الجديد السيد المستشار/ محمد شوقي
أنه يحقق فى تجاوزات كتير تمت ضدنا وبعضها متطرف جداً!
والكل أجمع على ضرورة تدخل النائب العام بنفسه لوقف استخدام النفوذ المغالى فيه
زي اللي حصل فى قضية الاستيلاء على معداتنا ومقراتنا الإدارية
داخل مشروع صن كابيتال سنة 2019
إتهمنا فيها أحمد طارق شكري والسيد المكاوي وآخرين
والنيابة حققت وسمعت للشهود وراجعت سندات الملكية
والصور الفوتوغرافية اللي الشرطة صورتها فى المعاينة للمعدات وعليها لوجو الشركة
وبالفعل النيابة قررت إحالة المتهمين للمحكمة بتهمة السرقة
وقرار الإحالة قدام حضراتكم على الشاشة
المتهمين قدموا مستندات ملكية مزورة للنيابة!
والسيد/ محمد رجب المحامي، محامي رئيسة مجلس الإدارة السيدة/ سمر حمدي
انتحل صفة الممثل القانوني للشركة، وإدعى إن المستندات مش مزورة!
تقوم النيابة تحفظ القضية من غير ما تستكمل التحقيقات!
هو إيه اللي بيحصل ده؟!
أي نفوذ بيستخدمه خصومنا علشان يحصل ده كله؟
وهي دي مش حاجة تستحق تدخل النائب العام علشان ينقذنا من الإفترا ده؟!
وفى قضية الاستيلاء على معداتنا من داخل حرم ميناء الإسكندرية
النيابة ما حققتش مع المسئولين فى الجمارك التابعين لوزارة المالية
ولا مع المسئولين في هيئة الطرق والكباري التابعة لوزارة النقل
ولا حققت مع الوكيل الملاحي “شركة وكالة الخليج”
إللى هى السبب الرئيسي في سرقة معداتنا بأكتر من 30 مليون جنيه بأسعار 2019
وما حققتش فى أكتر من 15 مستند مزورين
بأختام بنكية مزورة عن بنك الإسكندرية وبنك الـ CIB
ورافضه تصدر قرار بتسليمنا العربيتين إللى الشرطة ضبطتهم
واللي تمنهم النهارده يعدى الـ 10 ملايين جنيه
وهل كل التجاوزات دى ما تستحقش تدخل حازم من النائب العام علشان ينقذنا من كل الظلم ده؟!
يا سيادة المستشار محمد شوقي تخيل حضرتك أنه صدر قرار من مكتب النائب العام السابق نفسه
بتفريغ كاميرات بنزينة توتال فى الشيخ زايد إللى خصومنا هددوني فيها باستخدام السلاح
وبالرغم من كده النيابة حفظت المحضر!!
يا حضرات المحترمين اللي بتشوفوا الفيديو
يا سيادة المستشار محمد شوقي النائب العام
يا سيادة المستشار عمر مروان وزير العدل
تدخلوا وإنقذونا من نفوذ خصومنا
أغيثونا علشان ربنا وعلشان مصر وسمعتها
عودة أطفال محمد الحسينى للدراسة وطلب المساعدة لتصعيد الموقف لإنقاذ الأم والأب من جبروت ونفوذ الخصوم
محتوى الفيديو
الحمد لله رب العالمين بنات محمد الحسيني ربنا وفقهم وقدروا ينجحوا في اختبارات تحديد المستوى ورجعوا للدراسة من تاني من غير ما يفقدوا أي سنة دراسية بفضل الله وبفضل دعم حضراتكم لينا.
البنت الصغيرة إتسكنت خلاص في مدرسة حكومية، لكن نورين الكبيرة للأسف لسه مش لاقيين لها مكان متاح في المدارس.
وحقيقي الإدارة التعليمية في الشيخ زايد وإدارة مدرسة الأورمان كانوا في قمة التعاون والاحترام وسهلوا علينا كل الإجراءات، جزاهم الله كل الخير على موقفهم الإنساني المحترم.
وأرجو من إدارة الشيخ زايد التعليمية استكمال دورها الإنساني في تسكين نورين في مدرسة حكومية ومراعاة ظروف الأطفال الاستثنائية وقت امتحانات أعمال السنة.
ونرجو من الشرطة توفير الحماية اللازمة للأطفال في فترة الامتحانات النهائية.
وندعو الله بزوال معاناة أطفالنا في غزة وأهلهم وتقبل من قُتل في الشهداء إن شاء الله.
ولعل الموقف الإنساني لوزارة التربية والتعليم يكون بداية لمواقف إنسانية مشابهة من وزارة العدل والنائب العام الجديد ووزارات النقل والمالية والداخلية.
لأن مشكلة الأطفال مش هيكمل حلها إلا لما تعيش أسرتهم بشكل طبيعي، وده مش هيتحقق إلا لما تتلغي الأحكام على أمهم وأبوهم واللي مش ممكن يتم إلا لو اتخذت الدولة إجراءات حازمة وحاسمة ضد خصومنا بدون مراعاة لنفوذهم.
كتير من أصدقائنا المحترمين هنا نصحوني باللجوء لرئيس الوزراء أو حتى لرئيس الجمهورية نفسه.
بيقولوا لي خصومك مش ملوك مصر علشان يعملوا ده كله!!!
ولو الأمر إتصعد لفوق خصومك هيتفرموا في أيام لأن اللي بيعملوه غريب جداً وانتهى من أيام مراكز القوة في الستينات.
وأنا بقول لحضراتكم بصراحة أنا مش عارف أصعد الموقف لفوق إزاي ولو تقدروا تساعدوني في تصعيد الموقف أكون شاكر جداً لحضراتكم.
وبشكر حضراتكم تاني على دعمكم لأطفال محمد الحسيني.
الحمد لله، الحمد لله.
أغرب عملية تهريب قامت بها عصابات الجريمة المنظمة فى ميناء الإسكندرية | إثباتات بالأدلة والمستندات
محتوى الفيديو
هوضح فى فيديو النهارده الأطراف إللى إشتركت أو تواطئت فى تهريب معداتنا من ميناء إسكندرية ومين شارك أو تواطأ فى عمليات التزوير إللى بسببها خرجت وإتسلمت معدات ضخمة تُقدر بعشرات الملايين من حرم ميناء إسكندرية لصالح شركة غير شركتنا.
ودى حاجة غريبة جدا مش بتحصل فى أى حتة فى العالم!
ومن حق أصدقائنا الأفاضل إنى أرد على تساؤلاتهم المنطقية.
إحنا إستوردنا بإسم شركتنا معدات بناء عبارة عن عربيات تحمل مضخات خرسانية، العربيات ماركة مرسيدس وسكانيا وتحمل مضخات خرسانية صينية الصنع ماركة زووم ليون. {أنظر الصور}
الشركة المُصدرة شركة صينية حصلنا منها على خصومات كبيرة لأنى Friend of China أو صديق للصين من سنة 1996.
الشركة الصينية شحنت العربيات من موانئ فى ألمانيا وإيطاليا لصالح شركتنا فى مصر شركة (إيجيبشن ستار للتجارة والإستثمار).
إسم الشركة واضح فى البيان الجمركى الموحد ورقم متعامل المستورد واضح ورقم بوالص الشحن واضح تماماً. {أنظر المستندات}
وبالطبع قبل الإستيراد لازم نكون فتحنا ملف فى الجمارك وفيه كل أوراقنا الرسمية وكل البيانات للإتصال بينا، {أنظر المستندات}
والملف ده بشكل آلى بيكون فى منه نسخ، فى عند الوكيل الملاحى ووزارة النقل والمالية وكل وزارات وجهة رسمية بيتم التعامل معاها لغاية ما العربيات تترخص فى المرور.
ومش بيحصل فى الملف ده أى أخطاء لأى بيانات مهما كانت بسيطة لأن كلها مسجلة على السيستم الحكومى!
الشحنات إتأخرت فى الوصول لمصر!
إتصلنا بالشركة الصينية نسألها عن السبب؟
قالت لنا إن الشحنات وصلت مصر وإن الوكيل الملاحى إستلمها وأنهى الإجراءات!
إتصلنا بالوكيل الملاحى (شركة وكالة الخليج)، قالت إنه سلم الشحنات خلاص ومالناش عنده حاجة!
ومن هنا عرفنا إننا إتسرقنا من عصابة كبيرة!
وإللى حصل كالتالى:
الوكيل الملاحى (شركة وكالة الخليج) فعلاً إستلم 5 شحنات عربيات من سفن الشحن فى ميناء إسكندرية فى مدة “شهرين” لصالح شركتنا، والمفروض أنهم كانوا يبلغونا إن العربيات وصلت ميناء إسكندرية وعندهم بيانات التواصل كاملة فى الملف الخاص بشركتنا!
لكن ما عملوش كده!
الوكيل الملاحى (شركة وكالة الخليج) ولمدة شهرين كانت بتسلم 5 شحنات بتاعتنا بتفويضات مزورة لأشخاص ليس لهم علاقة بشركتنا!
دى أذونات التسليم الخمسة لصالح شركة EGYPTIAN STAR FOR TRADE AND INVESTMENT إللى هى بالعربى: إيجيبشن ستار للتجارة والإستثمار، إللى هى شركتنا، لكن لأشخاص مالهومش علاقة بشركتنا نهائى، بتفويضات عليها أختام صحة توقيع مزور عن بنك CIB. {أنظر المستندات}
مافيش حاجة إسمها تسليم شحنات بتفويضات!
لأن لازم فى توكيلات رسمية موثقة!
وزى ما حضراتكم شايفين تزوير صحة التوقيع عن بنك CIB ساذج جداً!
والبنك أرسل للنيابة العامة خطاب يفيد بأن أختامه على صحة التوقيع مزورة. {أنظر المستندات}
شركة وكالة الخليج شركة عالمية تأسست فى الكويت وعندها أكثر من 300 مكتب فى أكثر من 50 دولة فى العالم، مستحيل تغلط فى إجراء روتينى زى إللى تم.
وأنا إتصلت هاتفياً بالسيد/ ستيوارت بووِى نائب رئيس الشركة للشئون التجارية فى المركز الرئيسى فى دبى {أنظر الصورة} وقالى أتوجه للفرع فى مصر، وبالفعل قابلت السيد/ محمد الألفى مدير عام شركة وكالة الخليج فى مصر فى المقر الرئيسى فى الشركة فى مصر الجديدة فى المقر الرئيسى فى الشركة فى مصر الجديدة، وقالى أروح لمدير الفرع فى إسكندرية السيد/ شريف البندراوى.
والإتنين بعد كده تجاهلونا وتهربوا من مقابلتنا وكأننا بنتسول شحنات المعدات بتاعتنا إللى بعشرات الملايين، مع أنهم مسئولين بشكل كامل عن تعويضات بقيمة المعدات.
يعنى (شركة وكالة الخليج) شاركت فى تهريب معداتنا، وإحنا إتهمناها بوضوح.
والنيابة طلبت منها إرسال الملف الخاص بينا بشركتنا، وشركة وكالة الخليج أرسلته فعلاً للنيابة. {أنظر المستندات}
طيب فين التعويضات عن قيمة المعدات من الوكيل الملاحى (شركة وكالة الخليج)؟
وليه النيابة ما وجهتش لها إتهام بالمشاركة فى تهريب معداتنا؟؟
من حقنا توضيح من النيابة، وبنناشد المسئولين والأخوة المحامين فى مصر والكويت والإمارات أنهم يقفوا معانا ويدعمونا فى مواجهة الوكيل الملاحى (شركة وكالة الخليج).
الخطوة إللى بعد كده، إن مجموعة الأشخاص المذكورين فى التفويض المزور دول إتوجهوا لجمرك إسكندرية التابع لوزارة المالية. {أنظر المستندات}
مانعرفش إيه إللى حصل بعد كده، مانعرفش إيه إللى حصل فى الجمرك.
وكأنه منطقة محرمة ومحظورة ومش من حق أصحاب الشحنات يعرفوا شحناتهم راحت فين!
لكن نعرف إن النيابة إستعلمت عن وصول معداتنا من مدير مصلحة الجمارك فى إسكندرية وطلبت منه أصل التفويض المنسوب لشركتنا. {أنظر المستندات}
ونعرف كمان إننا لقينا نموذج 6 بإسم الشركة إللى إستولت على معداتنا (إيجيبشن ستار للمقاولات).
لقيناه مزور صحة التوقيع عن بنك الإسكندرية، والبنك أرسل للنيابة العامة خطاب يفيد بأن أختامه على صحة التوقيع مزورة. {أنظر المستندات}
وطبعاً لازم مجموعة المزورين يتوجهوا لهيئة الطرق والكبارى والنقل البرى علشان يحصلوا على الموافقات بالإفراج عن العربيات من جمرك إسكندرية.
ولقينا الخمس مفاجآت دى:
خمس موافقات بالإفراج عن شحنات…شحناتنا الخمسة معتمدة وموقعة ومختومة من رئيس الإدارة المركزية للنقل البرى المهندس/ محمد عنانى عبد اللطيف وموجهة للسيد/ مدير جمرك إسكندرية لصالح شركة (إيجيبشن ستار للمقاولات). {أنظر المستندات}
شركة غير شركتنا!
إحنا شركة (إيجيبشن ستار للتجارة والإستثمار).
قدرت أتصل هاتفياً بالسيد الفريق/ كامل الوزير وزير النقل، مشكوراً وجهنى للسيد اللواء/ حسام الدين مصطفى (رئيس مجلس الإدارة لهيئة الطرق والكبارى).
وبالفعل إتشرفت بمقابلته، وتحرى عن الأمر، ورد علينا فى خطاب رسمى محتواه:
إن المستندات الرسمية الواردة من جمرك إسكندرية كانت الشحنات فيها لصالح (إيجيبشن ستار للمقاولات).
إذاً كده بالتأكيد حصل تزوير رسمى من موظفى جمارك ميناء إسكندرية حسب رد السيد اللواء/ حسام الدين مصطفى.
وده منطقى جداً بالطبع لأن عندهم ملف كامل عن شركتنا وعندهم وصادر عنهم البيان الجمركى الموحد للوارد ده. {أنظر المستندات}
مازلنا محتاجين من وزارة النقل أمرين فى غاية الأهمية:
الأمر الأول:
المفروض إن الهيئة العامة للطرق والكبارى عندها ملف طبق الأصل من ملف شركتنا الموجود فى جمرك إسكندرية.
فإزاى يعتمدوا على مجموعة مستندات جاى بها مندوب مفوض من شركة (إيجيبشن ستار للمقاولات) إللى إستولت على معداتنا ويسلموهم الموافقات بالإفراج الجمركى عن 5 شحنات بعشرات الملايين وفى خلال مدة شهرين بدون الرجوع للملف الخاص بالشحنات على السيستم!
مش ممكن يحصل كده غير لو كان فى تواطؤ ضخم ولازم يتحقق فيه بشفافية.
الأمر التانى:
الوكيل الملاحى (شركة وكالة الخليج) بتكون تحت إشراف قطاع النقل البحرى فى وزارة النقل وضرورى الوزارة تتخذ إجراءات واضحة وصارمة ضدهم وترجع لنا حقوقنا،(شركة وكالة الخليج) وكيل ملاحى كبير فى أكتر من 50 دولة وصعب أنها تسمح لموظفيها فى مصر بالمشاركة فى عملية التهريب.
وبعد كل الوقائع والمستندات إللى عرضتها على حضراتكم،
كل المتهمين أخدوا براءة فى المحكمة!
ولجأنا لمحكمة النقض !!
حقيقى مش عارف؟!
إزاى ممكن يحصل خطأ فى حاجة واضحة زى الشمس؟!
شركتنا إسمها (إيجيبشن ستار للتجارة والإستثمار) رئيسة مجلس الإدارة سمر حمدى وانا العضو المنتدب فيها. {أنظر المستندات}
والشركة إللى إستلمت العربيات إسمها (إيجيبشن ستار للمقاولات) يُقال أنها مملوكة لـ أحمد عبد العليم رجل الأعمال الشاب وصاحب شركة شام للمعدات والصديق المقرب للسيد المكاوى رجل الأعمال الشهير. {أنظر الصور}
وكان بيننا سابق تعامل أثناء عملية مشروع صن كابيتال المملوكة للنائب طارق شكرى وكيل لجنة الإسكان بمجلس النواب. {أنظر الصور}
أعتقد كده الأمر محتاج لرد وبيان واضح:
من وزارة المالية بخصوص ما تم فى جمرك إسكندرية؟
من وزارة النقل بخصوص ما تم فى ميناء إسكندرية وما تم من هيئة الطرق والكبارى وأيضاً موقفهم من شركة وكالة الخليج ؟
ورد من وزارة العدل بخصوص الحكم ببراءة المتهمين؟
ورد من النيابة العامة بخصوص عدم إتهام الوكيل الملاحى”شركة وكالة الخليج”؟
وتوضيح من وزارة الداخلية بخصوص عدم البحث عن 6 عربيات المفقودة وبخصوص عدم تسليمنا العربيتين المتحفظ عليهم؟؟
وبيان من إدارة شركة وكالة الخليج هنا أو فى المركز الرئيسى فى الإمارات، ولازم تعوضنا عن قيمة معداتنا.
وبيان من بنك إسكندرية وبنك CIB بخصوص عدم توجيه الإتهام لمن زوروا أختامهم على مستندات تحمل أسمائنا وبسببها إستولوا على معداتنا؟
حقيقى مش عارف أعمل إيه
مش عارف أقول إيه
ربنا كبير
مواصفات المعدات المهربة من ميناء الإسكندرية وطريقة التواصل للحصول على مكافأة الـ 10% من قيمة المعدات
محتوى الفيديو
نسبة الـ 10% لفاعل الخير اللي هيبلغ عن عربياتنا “مضخات الخرسانة”
اللي إتهربت من ميناء إسكندرية
هي حق أصيل ليه
لأنه هيكون عمل فينا معروف كبير فعلاً
هم 8 عربيات
منهم 4 عربيات سكانيا P420 صناعة 2012
الرجالة مسكوا واحدة منهم في شارع عباس العقاد
و4 عربيات مرسيدس 4141 صناعة 2012
والرجالة مسكوا واحدة منهم فى منشية القناطر
نبدأ بالـ 3 عربيات الـ سكانيا الـ P420
كلهم طبعاً نفس الموديل لكن مانعرفش ألوانهم
لأنهم إتهربوا من ميناء إسكندرية قبل ما الوكيل الملاحي يبلغنا بوصلوهم مصر
ده رقم شاسيه العربية الـ سكانيا الأولى
وده موديل مضخة الأسمنت الـ ZOOMLION اللي كانت راكبة على العربية وممكن يكونوا غيروا المضخات
ده رقم شاسيه العربية الـ سكانيا التانية
وده موديل مضخة الأسمنت الـ ZOOMLION اللي كانت راكبة على العربية
ده رقم شاسيه العربية الـ سكانيا التالتة
وده موديل مضخة الأسمنت الـ ZOOMLION اللي كانت راكبة على العربية
الـ 3 عربيات المرسيدس موديل 4141 وصناعة 2012
طبعاً نفس الشكل
وزى ما وضحت مانعرفش ألوانهم لأنهم إتهربوا من ميناء إسكندرية قبل ما نشوفهم
ده رقم شاسيه أول عربية مرسيدس
وده موديل مضخة الأسمنت الـ ZOOMLION اللي كانت راكبة على العربية
ده رقم شاسيه تاني عربية مرسيدس
وده موديل مضخة الأسمنت الـ ZOOMLION اللي كانت راكبة على العربية
ده رقم شاسيه تالت عربية مرسيدس
وده موديل مضخة الأسمنت الـ ZOOMLION اللي كانت راكبة على العربية
ونسبة الـ 10% من تمن العربيات محفوظة مع وافر الشكر والتقدير
للي هيساعدنا في العثور على المضخات وأيضاً للي هيقدر يساعدنا في استلام عربياتنا
المتحفظ عليها عند نقطة زهراء مدينة نصر وعند قسم منشية القناطر
دي العربية إللى إتحفظت عليها نقطة زهراء
مدينة نصر، سكانيا P420
كان عليها مضخة أسمنت ZOOMLION موديل المضخة ظاهر على الشاشة
ورقم الشاسيه أيضاً ظاهر على الشاشة
وكانت عليها لوحات تجارية ع ن ف 4562 مصر
الرجالة لقوها شغالة في شارع عباس العقاد وبلغوا قسم أول مدينة نصر
والقسم فعلا إتحفظ عليها وقام بالإجراءات لكن بعد كده رحلوها عند نقطة زهراء مدينة نصر
تقريبا علشان مافيش مكان لركنها عند القسم
ودي العربية اللي إتحفظت عليها قسم منشية القناطر
مرسيدس 4141
رقم الشاسيه ظاهر على الشاشة
كانت بدون لوحات
وكان عليها مضخة أسمنت ZOOMLION وموديل المضخة ظاهر على الشاشة
الرجالة لقوها شغالة في الشارع بجوار محطة مياه منشية القناطر
وبلغوا قسم الشرطة هناك وإتحفظوا عليها
وحضراتكم مشكورين تقدروا تبلغونا بعثوركم على العربيات من خلال الرسائل
إحنا عندنا حسابات على تويتر وتيك توك وإنستجرام
وعندنا صفحة على فيسبوك وقناة يوتيوب
وكلهم مكتوبين في النص الملحق مع الفيديو
وبالطبع مش هنعلن عن شخصية المُبلغ إلا بناءاً على رغبته حفاظاً على الخصوصية
وخصوصاً إن كان شغله في الموقع الموجود فيه العربيات المُهربة
في الحالة دي ممكن يبلغنا بنفسه أو عن طريق أحد معارفه
وأيضاً تسليم المكافأة هيكون ليه شخصياً أو لأي حد يحدده مع ضمان الحفاظ على الخصوصية
ربنا يوفق حضراتكم وتكونوا سبب في عثورنا على عربياتنا اللي إتهربت من ميناء إسكندرية
ربنا كبير
مكافاة 10% من قيمة أى من معداتنا المهربة من ميناء الإسكندرية لمن يعثر عليها
محتوى الفيديو
معروف أنه بيحصل عمليات تهريب من المواني
ولكن !!
خروج بضائع ومعدات من حرم مينا
بمستندات مزورة أو حتى غير سليمة
بيعني شيء واحد فقط ؟
هو: تواطؤ موظفين رسميين بجانب الوكيل الملاحي طبعاً
في جريمة التزوير والتهريب
وده اللي حصل معانا في ميناء إسكندرية
المعدات عبارة عن 8 عربيات “مضخات خرسانة ضخمة”
خرجت لصالح شركة اسمها مختلف عن اسم شركتنا الموجود على الإفراج الجمركي للمعدات
دي حاجة مش بتحصل نهائياً!
منطقي إن إحنا نوجه أسئلة
واضحة ومباشرة لوزارة المالية وهيئة ميناء إسكندرية
من حق الناس تعرف
أسماء الموظفين اللي قاموا بالاشتراك ده في عملية التهريب والتزوير
معانا إفراج جمركي لـ 8 بامبات “عربيات”
ماركاتهم ومواصفاتهم محددة ولهم أرقام شاسيهات ولهم أرقام مواتير
كلفنا بعض الرجالة يلفوا حوالين المواقع المصرية “مواقع البناء في مصر”
وفعلا وجدوا عربيتين من عربياتنا مافيش عليهم نمر، وبلغوا الشرطة
والشرطة اتحفظت عليهم! واحدة عند نقطة زهراء مدينة نصر
والتانية عند قسم منشية القناطر
ورافضين تسليمهم لينا، مش عارف ليه ؟؟!!
أتخيل أن الشرطة تقدر تلاقى 6 عربيات التانية خلال 48 ساعة أو حتى في خلال أسبوع
لأن العربيات ضخمة! وشكلها مميز! وعددها محدود!
لأن سعرها بيكون عدى النهارده ال 8 مليون جنيه للعربية، وكمان بياناتهم موجودة.
فممكن الشرطة تلاقيهم من خلال بيانات المرور أو بمراجعة مواقع البناء
وأنا مستعد النهارده
أدفع نسبة 10% من قيمة أي معدة للشخص اللي يلاقيها
أو أتبرع بها لصالح الدولة لو الشرطة لقيتها
العربيات إتهربت من مينا إسكندرية بقالها 3 سنين
واللي هيلاقيها فعلاً هيكون عمل فينا معروف كبير
حقيقي من غير مساعدتكم لينا، مش عارف هنعمل إيه!
أسباب تأجيل مهندس رضا عبد الكريم اللجوء للتحكيم الدولى، والمفاجأة من قرارات (حفظ) القضايا والبلاغات
محتوى الفيديو
اللجوء للتحكيم الدولي أو للتقاضي في فرنسا أو إنجلترا
كان نصيحة عدد كبير من الناس الأفاضل المشكورين
اللي علقوا على فيديو الاستغاثة اللي نشرناه
لكن تعرفوا استثماري في مصر كان بداية تحالف استثماري
مع عدد من رجال الأعمال الأوروبيين والأسيويين الأصدقاء
وإني إضطريت آسفاً!
لإبلاغهم بالممارسات الإجرامية اللي حصلت معايا في مصر!!
كسبب واقعي لعدم تدشين التحالف
تخيلوا تأثير اللي سمعوه منى كصديق مصري الأصل
أثر أد إيه على الثقة في الاستثمار في مصر
عرفتوا خطورة توجهي للتحكيم الدولي أو للقضاء الفرنسي أو الإنجليزي
على الاستثمارات الأجنبية في مصر بشكل عام ؟
في وقت الاقتصاد المصري محتاج بشدة
لكل استثمار أجنبي يدخل للسوق المصري رؤوس أموال بالدولار
وإحنا لجأنا بالفعل للشرطة المصرية وللقضاء المصري
وعملنا محاضر وافية ورفعنا قضايا كتير
ومقدمين مستندات وإثباتات تثبت كل حقوقنا
لكن المشكلة بتحصل لما بنواجه شيء عجيب!
في كل محضر أو قضية
وهو الحفظ!!
كل المحاضر والبلاغات والتحقيقات والقضايا بتتحفظ…كلها!!
ولما رجعت لمحامين كبار قالولى خصومك كبار !؟
لكن نقدر نعملك بلاغات جديدة ويتعاد فيها التحقيقات
وخلاص ما عنديش غير قضية
الاستيلاء على معداتنا من داخل حرم ميناء إسكندرية
لكن حصل فيها حاجة غريبة مش فاهمها
والمحامي عمل فيها نقض
وقضيتين قدام المحكمة الاقتصادية
منهم قضية كبيرة منتظرين تقديم تقرير الخبراء فيها
بعد أخر جلسة في 2 مايو اللي فات
بخصوص إثبات حقنا في المعدات والمستخلصات المالية وأعمال المقاولات
التي تمت في مشروع صن كابيتال
والمحامين بيقولوا أنها بتكون إجراءات خلال أسابيع
لكن أنا حقيقي عجزت أفهم القوانين المصرية
ومش عارف أتعامل مع النظام القضائي المصري
مش عارف !!!
مش عارف !!!
أطفال محمد الحسيني محرومين من الدراسة من 3 سنوات بسبب التهديد بالخطف
محتوى الفيديو
التهديد بخطف بنات محمد الحسيني
شريكي والمدير التنفيذي للشركة
هو أهم وأخطر حاجة في فيديو الاستغاثة اللي نشرته
محمد الحسيني عنده 3 بنات
البنتين الكبار ما بيمتحنوش بقالهم 3 سنوات!!!
آخر سنة دراسية امتحنوها
كانت في 2019/2020 !!
نورين الكبيرة كان المفروض إنها تمتحن سنة سادسة السنة دي
أخر سنة امتحنتها سنة تالتة!!!
لي لي الصغيرة 9 سنوات
أخر سنة حضرتها kg2
أنا ما شوفتش ظلم زي كده في أي مكان في العالم!
وكل أهلي ومعارفي والمحامين بيأكدوا لي
إن البوليس المصري ما بيسمحش بأي تهديد من هذا النوع
البنات كانوا في مدرسة الأورمان الخاصة في الشيخ زايد
تقدروا تتأكدوا من المدرسة والإدارة التعليمية
وتقدروا من بياناتهم في وزارة التربية والتعليم تعرفوا….
أنهم فقدوا 3 سنين من دراستهم!!!
ومش عارف ممكن نعوضهم عنهم إزاي؟!
واللي مزود مشكلتهم :
الأحكام اللي على باباهم، واللي خلته يهرب بيهم سنتين
ودلوقتي محبوس بسببها في قسم تاني الشيخ زايد 18 سنة،
والأحكام اللي على مامتهم
واللي بسببها واخده الأطفال معاها وهربانة بيهم ومش عارفه….. تستغيث بيكم
والأحكام على باباهم ومامتهم سهل تتلغي،
لو ما كانش تم حفظ القضايا والمحاضر اللي عملناها،
أو لو الخبراء قدموا تقاريرهم للمحكمة الاقتصادية علشان نثبت……
إن المعدات اللي بسببها إتحكم عليهم
استولى عليها السيد المكاوي صاحب شركة إم أوتو
من مشروع صن كابيتال المملوكة للنائب طارق شكري وكيل لجنة الإسكان
الموضوع سهل الحل لو الناس وصلوا صوتنا للمسئولين
ووقتها أحمد عبد العليم صاحب شركة شام للمعدات
مش هيقدر ينفذ تهديده بخطف الأطفال
ومشكلة الأطفال تتحل
من غير مساعدتكم لأطفال محمد الحسيني، مش هيقدروا يرجعوا للدراسة تاني.
مهندس رضا عبد الكريم مستثمر فرنسى من أصل مصرى يستغيث بالشعب المصرى وأجهزة الدولة المصرية
محتوى الفيديو
أنا رضا عبد الكريم
مهندس معماري والعضو المنتدب لشركة إيجيبشن ستار
مصري
وعندي الجنسية الإنجليزية والفرنسية
المفروض إني مستثمر أجنبي
عمري 71 سنة
رجعت مصر في 2017 بعد 48 سنة في الغربة
علشان أقضي المرحلة الأخيرة من حياتي أبنى وأعمر في بلدي وسط أهلي
ولسوء الحظ، الشغل أخدنا لتنفيذ مقاولات ضخمة في صن كابيتال
المملوكة للمهندس طارق شكري
وكيل لجنة الإسكان بمجلس النواب
وهناك للأسف اتعرفنا على السيد المكاوي، صاحب شركة إم أوتو
اللي عندها سلسلة معارض السيارات ومصنع سيارات ميكروباص فوتون
وعرف إني واحد من مواطنين جزيرة جانزي
اللي هي أوف شور
الموجودة في بحر المانش
أصر يضخ “مئات ملايين الجنيهات” في الشركة كمساهمة من شخص تابع له ومجهول لينا!
خشيت أنها تكون عملية لغسيل الأموال!! فرفضت
قالي “أنك بتخبط في حديد”!! وفعلاً كان عنده حق
تم منعنا من دخول موقع العمل في صن كابيتال
وتم الاستيلاء على معدات الخرسانة الجاهزة والمقرات الإدارية
واستولوا على مستخلصاتنا المستحقة
كل ده بأكتر من 50 مليون جنيه في أيديهم مش عارفين نستردهم
وكمان السيد المكاوي اشتغل بمعداتنا
ويمكن دلوقتي يكون حقق أرباح من تشغيلها أكتر من تمنها
ومن مينا الإسكندرية تم الاستيلاء على 8 معدات قمنا باستيرادها
عربيات وبامبات ضخمة لصب الخرسانة الجاهزة بأكتر من 30 مليون جنيه
باستخدام مستندات مزورة عن شركتنا وبنك الـ CIB وبنك الإسكندرية
والشرطة ضبطت معدتين من معداتنا المهربة من المينا، وقاموا بحجزهم
واحدة قدام نقطة زهراء مدينة نصر والتانية قدام قسم منشية القناطر
ورافضين تسليمهم لينا، مش عارف ليه؟؟؟
وتم الاستيلاء على مقدمات حجز سيارات لنا
من معرض سيارات الوهاب التابع لمنصور شيفرولية
والبنك العربي الأفريقي عمل تجاوزات في حسابنا
أخدوا كل حاجة مني ومن شُركاتي خلاص
ومش بس كده
دول هددوني في بنزينة توتال في الشيخ زايد، وكلها كاميرات!!!
وطاردوني بالعربيات وهددوني بالمسدسات والبلطجية بتوعهم هاجموني مرتين
منهم مرة وقعوني على الأرض، اتصبت في كتفي بقطع للوتر
وفى الأخر حبسوني في بلدي! وأنا عندي 71 سنة!
لمدة 4 شهور بالغلط!! في قضية إيصال أمانة ثبت تزويره من المعمل الجنائي
ومحكمة النقض لغت الحكم، ولكن بعد 4 شهور حبس!!!
ومش أنا لوحدي
شُركاتي كمان اتعرضوا لأذى واعتداءات خطيرة من خصومنا، هيحكوها لكم
لكن، أهمها وأخطرها
التهديد الجاد بخطف بنات محمد الحسيني، المدير التنفيذي للشركة
واللي اضطره، لإخفائهم عن البيت من 3 سنين!!!
البنات ما راحوش الامتحانات، من سنتين!!
وفقدوا سنتين من عمرهم!!
وهيفقدوا التالتة!!! إن ما حصلش تدخل سريع وعاجل لحل مشكلتهم
مش قادر أقول أنى غلطت في رجوعي لمصر
أكمل فيها بقيت حياتي، بعد العمر ده كله
وأنى ندمان في إن أنا سمعت لـكلام المهندس/ محمد الحسيني
المدير التنفيذي، في تأخيري بالاستغاثة، في نشر الاستغاثة بيكم
واللي كانت نتيجته، إن البلطجية بتوعهم اتربصوا له، وضربوه للمرة التالتة
وخطفوه ودوه شرطة مدينة نصر، شهر يناير اللي فات
عشان يقضى 18 سنة سجن، في قضايا شيكات لـضمانات لمعدات
معدات. خصومنا هُم already بالفعل استولوا عليها
والقضية الكبيرة الـ في المحكمة الاقتصادية
مقدمين فيها المستندات اللي بتثبت إنهم استولوا على المعدات، معداتنا ومستخلصاتنا المالية
ومنتظرين تقرير الخبراء فيها
وندمان أكتر بسبب تأخيرنا
بنات محمد الحسيني اللي هما ما إمتحنوش الترم الأول
ومش عارف هيقدروا يمتحنوا الترم التاني ولا لأ ؟
في ظل حزنهم على باباهم طبعاً
وخوف مامتهم من الحبس هي التانية
وضياع السنتين بالنسبة للبنات فى الدراسة
وخوف مامتهم طبعاً على أي ضرر من الخصوم على البنات
لأنهم في السابق، في حصل نوع من التهديد لهم
من غير مساعدتكم لنا، مش عارفين ممكن نعمل إيه ؟!
حسبنا الله ونعم الوكيل … حسبنا الله ونعم الوكيل
كلمة أستاذ/ جمال عيد:
في الحقيقة أنا شوفت الفيديو بتاع المهندس/ رضا
وقرأت!!! الأوراق بتاعت القضايا
مش هتكلم على القضايا، لأنه أكيد في محامين
ولأن في إيه؟ القضايا أكيد منظورة أمام المحاكم
لكن لفت نظري أن كلامه، عن تهديدات! وملاحقات! واعتداءات!!
بيقولها على محمد الحسيني! وأيضاً على زوجته!!
ولدرجة الخوف أنه أطفالهم، مابيروحوش…امتحانات من 3 سنين
ده كلام يستحق التحقيق، ويستحق فعلا…الوقفة عنده!!!
خصوصاً من النيابة، والمجلس القومي للأمومة والطفولة، ومن وزارة التربية والتعليم
الكلام..عن القضايا والمعدات اللي من إسكندرية بيقول أنه تم الاستيلاء عليها
دي حاجات تستحق تحقيق عادل
مش بس لأنه…مستثمر معاه جنسيات أوروبية، فرنسية أو غيرها
لكنه كمان، لأنه مواطن مصري قرر يرجع لبلده
!!!!!!!
هأكد..!!! بشدة على حق أطفال محمد الحسيني في أنهم يمتحنوا
وكفاية 3 سنين ضاعوا عليهم!!!
وإحنا في نهاية العام
منطقي أنه…نساعدهم في أنهم يمتحنوا امتحانات أخر السنة.
